Lucas verður frá í tvo til þrjá mánuði

Liverpool varð fyrir áfalli í dag þegar kom í ljós að brasilíski miðjumaðurinn Lucas Leiva verður frá keppni í tvo til þrjá mánuði vegna tognunar aftan í læri. Brendan Rodgers staðfesti þetta við fjölmiðla í dag.

„Það er leiðinlegt því hann er búinn að leggja mikið á sig að koma til baka. Þetta eru mjög sérstök meiðsli því hann tognaði mjög ofarlega á lærinu. Hann er búinn að fara í myndatöku og við hittum sérfræðing á eftir. Við þurfum að komast að því hvort hann þurfi að fara í aðgerð," sagði Brendan Rodgers, stjóri Liverpool.

Lucas Leiva sleit krossband í byrjun síðasta tímabils en var kominn á fullt fyrir þetta tímabil. Hann fór meiddur af velli eftir aðeins fimm mínútur á móti Manchester City á sunnudaginn.

„Það eru engin orð sem geta lýst tilfinningum mínum á þessari stundu. Það er erfitt að halda sér jákvæðum en ég er viss um að betri dagar bíði mín. YNWA," skrifaði Lucas Leiva inn á twitter-síðu sína.