Mancini: City búið að hafna fullt af tilboðum í Balotelli í sumar

Roberto Mancini, stjóri Manchester City, er búinn að staðfesta það að City hafi hafnað mörgum tilboðum í ítalska framherjann Mario Balotelli í sumar. Balotelli, sem er aðeins tvítugur, sló í gegn á EM í júní þar sem hann skoraði þrjú mörk þar af tvö þeirra í sigri á Þjóðverjum í undanúrslitaleiknum.

„Það voru fjögur eða fimm félög sem vildu fá hann. Þetta voru ekki bara félög frá Ítalíu heldur líka félög frá Frakklandi," sagði Roberto Mancini við Sky Sports.

„Mörg stórlið vildu fá hann en hann er heimsklassa leikmaður og það kom aldrei til greina hjá mér að segja já við einhverju af þessum tilboðum," sagði Mancini en Balotelli hefur verið afar duglegur að koma sér í vandræði í Englandi.

„Ég vona að hann haldi áfram að þroskast. Hann átti frábært Evrópumót og það ætti að hjálpa honum að átta sig á hversu hæfileikaríkur hann er. Það er mikilvægt að hann bæti hegðun sína í kringum fótboltann og ég vona að EM hjálpi til í því," sagði Mancini.

Englandsmeistarar Manchester City mæta bikarmeisturum Chelsea í leiknum um Samfélagsskjöldinn á morgun en leikurinn fer fram á Villa Park á morgun. Leikurinn hefst klukkan 12.30 og er í beinni útsendingu á bæði Stöð 2 Sport og Stöð 2 Sport 2.