Rodwell til Manchester City

Enski miðjumaðurinn Jack Rodwell hefur skrifað undir fimm ára samning við Englandsmeistara Manchester City.

Rodwell er fyrsti leikmaðurinn sem City fær til sín í sumar en lokað verður fyrir félagaskipti um mánaðarmótin. Rodwell, sem kemur frá Everton, hefur leikið 85 leiki með Liverpoolliðinu undanfarin ár og skorað fimm mörk.

„Ég elska möguleikann á að spila með nokkrum af bestu knattspyrnumönnum heimsins," segir Rodwell á heimasíðu City.

Roberto Mancini hefur gagnrýnt aðgerðarleysi City á leikmannamarkaðinum í sumar. Það á sér þó rætur í því að lítið gengur að losa launahá leikmenn undan samningi. Framherjarnir Emmanuel Adebayor og Roque Santa Cruz, sem hvorugur er í framtíðaráforumum Mancini, hafa ekki dregið til sín athygli annarra liða.

Evrópsk knattspyrnufélög eru undir pressu að hagræða í rekstri sínum vegna reglna Evrópska knattspyrnusambandsins varðandi sjálfbærni í rekstri.

Fyrsti leikur Manchester City í ensku úrvalsdeildinni er á sunnudag en liðið tekur þá á móti nýliðum Southampton.