Ivanovic fer ekki í bann þrátt fyrir rautt spjald

Branislav Ivanovic, varnarmaður Chelsea, þarf ekki að taka út þriggja leikja bann þrátt fyrir að hafa verið vísað af velli í 3-2 tapinu gegn Manchester City í leiknum um Samfélagsskjöldinn í gær.

Ivanovic fékk reisupassann fyrir háskálega tæklingu á Aleksandar Kolarov undir lok fyrri hálfleiks. Reiknuðu margir með því að Ivanovic myndi fyrir vikið missa af upphafi ensku úrvalsdeildarinnar.

Guardian greinir hins vegar frá því að svo verði ekki. Enska knattspyrnusambandið hafi árið 2006 breytt reglum sínum hvað brottrekstra í æfingaleikjum varðaði. Þá fengu Paul Scholes og Wayne Rooney, leikmenn Manchester United, rauð spjöld í leik gegn Porto á Amsterdam-mótinu. Félagarnir þurftu að sitja af sér þriggja leikja bann í upphafi leiktíðar.

Reglubreyting enska knattspyrnusambandsins virðist samkvæmt þessu einnig taka til leiksins um Samfélagsskjöldinn. Ivanovic verður því klár í slaginn gegn Wigan á DW-leikvanginum á sunnudaginn.