Given hættur að spila með landsliði Íra

Írinn Shay Given hefur lagt landsliðsskóna á hilluna. Markvörðurinn 36 ára lék 125 landsleiki fyrir þjóð sína sem er met.

„Þetta var afar erfið ákvörðun fyrir mig að taka. Ég hef varið sextán árum af lífi mínu með landsliði þjóðar minnar og hef sterkar taugar til landsliðshóps Giovanni Trapattoni," er haft eftir Given á heimasíðu írska knattspyrnusambandsins.

Given, sem stóð vaktina með Írum á Evrópumótinu í Póllandi og Úkraínu í sumar, var ekki valinn í landsliðið fyrir æfingaleikinn gegn Serbum á morgun. Trapattoni ákvað að gefa yngri mönnum tækifæri eftir lélegt gengi Íra á Evrópumótinu.

„Ég vil þakka Giovanni, Marco (Tardelli, aðstoðarþjálfara) og Alan Kelly fyrir þeirra stuðning meðan ég spilaði með landsliðinu. Ég verð áfram mesti stuðningsmaður landsliðsins og óska strákunum alls hins besta í undankeppninni," sagði Given.

Given spilaði sinn fyrsta leik með Írum gegn Rússum í mars 1996. Hann stóð vaktina í 125 landsleikjum fyrir hönd þjóðar sinnar sem er írskt met.