Koscielny hjá Arsenal: Ef við byrjum vel þá getum við barist um titilinn

Franski varnarmaðurinn Laurent Koscielny er sáttur með lífið hjá Arsenal og tilbúinn í titilbaráttuna í ensku úrvalsdeildinni í vetur. Þessi 26 ára miðvörður stóð sig vel á síðasta tímabili og gerði á dögunum nýjan samning við Arsenal.

Koscielny var ekkert smeykur við að framlengja við Arsenal þrátt fyrir stöðugan orðróm um að stjörnuleikmenn eins og Robin van Persie og Alex Song væru á leiðinni frá félaginu í viðbót við þá sem hafa stokkið frá borði undanfarin ár.

„Ég er ánægður hérna því ég er að spila fyrir stóran klúbb. Ég er sáttur inn á vellinum og fjölskyldan er ánægð hér þannig að það er engin ástæða fyrir mig að fara," sagði Laurent Koscielny í viðtali á heimasíðu Arsenal.

„Þetta er í fyrsta sinn sem ég er hjá sama klúbbi í meira en tvö ár. Ég kann vel við alla sem vinna hjá klúbbnum og ég er hrifinn af stuðningsmönnunum. Ég er mjög ánægður að spila fyrir stjórann og liðsfélagarnir eru viðkunnanlegir þannig að þetta var ekki erfið ákvörðun," sagði Koscielny.

„Ef við byrjum tímabilið vel þá getum við verið með í titilbaráttunni á þessu tímabili. Við lentum í vandræðum í byrjun síðasta tímabils en sýndum okkar rétta andlit eftir það," sagði Koscielny.

„Við verðum að vinna saman og hjálpa hverjum öðrum. Með góðri byrjun getum við afrekað eitthvað í deildinni á þessu tímabili," sagði Koscielny.