Mancini: Manchester United með besta framherjaparið í deildinni

Roberto Mancini, stjóri Englandsmeistara Manchester City, er harður á því að nágrannarnir úr Manchester United séu sigurstranglegasta liðið í ensku úrvalsdeildinni á þessari leiktíð þrátt fyrir að flestir spái City sigri og aðalástæðan er að United hafði betur en City í baráttunni um hollenska framherjann Robin van Persie.

„Van Persie var besti framherjinn á síðasta tímabili og með hann við hlið Rooney þýðir að þeir hafa besta framherjaparið í ensku úrvalsdeildinni. Mér var alvara í síðustu viku þegar ég sagði að Manchester United væri sigurstranglegasta liðið," sagði Roberto Mancini.

Robin van Persie og Wayne Rooney voru tveir markahæstu leikmenn ensku úrvalsdeildarinnar á síðustu leiktíð, Van Persie með 30 mörk í 38 leikjum en Rooney með 27 mörk í 34 leikjum. Þeir lögðu líka upp 21 mark saman og komu því alls að 77 mörkum sinna liða á síðasta tímabili.