Af hverju er Van Persie númer 20 hjá Manchester United?

Hollendingurinn Robin van Persie spilar væntanlega sinn fyrsta leik með sínu nýja liði Manchester United á móti Everton á morgun en United borgaði Arsenal 24 milljónir punda fyrir markakóng ensku úrvalsdeildarinnar á síðustu leiktíð.

Van Persie spilaði númer 10 hjá Arsenal en sú treyja er upptekin hjá United þar sem Wayne Rooney hefur spilað í henni frá 2007. Hollenski framherjinn varð því að finna sér nýtt númer og hann endaði á því að velja treyju númer 20 en af hverju?

Ole Gunnar Solskjær er einn frægasti leikmaður Manchester United til að spila í þessari treyju en Van Persie er þó ekki að velja þetta númer vegna hrifningar sinnar af norska markaskoraranum.

„Ég valdi númer 20 af því að ég er kominn hingað til þess að hjálpa Manchester United að vinna tuttugasta meistaratitilinn," sagði Robin van Persie í viðtali á heimasíðu Manchester United.

Kaupin á Van Persie gætu á endanum kostað United 70 milljónir punda samkvæmt heimildum Daily Mirror því í viðbót við það að borga Arsenal 24 milljónir fyrir leikmanninn þá þarf United að borga honum sjálfum ofurlaun upp á 210 þúsund pund á viku auk annarra bónusa.