Alan Pardew biðst afsökunar á því að hafa hrint aðstoðardómaranum

Alan Pardew, stjóri Newcastle, var rekinn upp í stúku í sigri Newcastle á Tottenham í fyrstu umferð ensku úrvalsdeildarinnar í gær en hann missti stjórn á skapinu og hrinti aðstoðardómaranum Peter Kirkup þegar hann var að mótmæla innkasti.

„Við erum himinlifandi með úrslitin en ég skammast mín fyrir mína hegðun," sagði Alan Pardew eftir leikinn. „Ég var einmitt að tala við strákana um frábæra Ólympíuleika og hvernig þeir ættu að vera góðar fyrirmyndir en fer síðan sjálfur og hrindi línuverðinum. Þetta var broslegt en hann var bara þarna beint fyrir framan mig," sagði Alan Pardew.

„Ég fór til dómaranna eftir leik og baðst afsökunar og tók það fram að ég myndi líka biðjast afsökunar opinberlega því þetta var algjörlega fáránlegt," sagði Alan Pardew en það má búast við að Martin Atkinson dómari leiksins skrifi um þetta í skýrslu sinni. Pardew þarf væntanlega að taka út leikbann vegna þessa furðulega atviks.

Það er hægt að sjá hvað Alan Pardew gerði með því að smella hér fyrir ofan.