Carragher: Lykilatriði að halda Agger og Skrtel hjá Liverpool

Jamie Carragher, reynsluboltinn í Liverpool-vörninni, vonast til þess að miðverðirnir Daniel Agger og Martin Skrtel verði áfram á Anfield en hann telur það lífsnauðsynlegt fyrir Liverpool að þessir tveir landsliðsleikmenn spili áfram með félaginu.

Það hefur verið orðrómur í kringum framtíð þeirra beggja en ensku meistararnir í Manchester City buðu meðal annars í Agger. Daniel Agger og Martin Skrtel eiga báðir eftir að ganga frá nýjum samningi við Liverpool og það hefur að sjálfsögðu ýtt undir þessar sögusagnir. Carragher er sannfærður um að þeir vilji báðir vera áfram hjá Liverpool.

„Þetta er kannski ekki alltof gott fyrir mína stöðu í liðinu en að gríni slepptu þá er það lykilatriði fyrir okkur að halda þeim," sagði Jamie Carragher við Daily Star.

„Vincent Kompany var frábær hjá Manchester City á síðustu leiktíð en hvað varðar samvinnu í vörn þá voru engir betri en þeir tveir í ensku úrvalsdeildinni," sagði Carragher.

„Ég held að hvorugur þeirra hafi skrifað undir nýjan samning ennþá en Martin er nálægt því og Daniel vill skrifa undir nýjan samning. Það eru frábærar fréttir," sagði Carragher.

Agger og Skrtel hjálpuðu Liverpool að fá aðeins 38 mörk á sig á síðustu leiktíð en þeir byrjuðu ekki vel í fyrstu umferðinni í gær þegar Liverpool-liðið steinlá 0-3 á móti West Brom. Báðir fengu þeir dæmt á sig víti og Agger var að auki rekinn útaf.