Lampard og Di Matteo hæla Hazard

Frank Lampard og Roberto Di Matteo hældu Eden Hazard í viðtölum eftir 2-0 sigur Chelsea á Wigan í dag en Roberto Martinez þjálfari Wigan sagði að lið hans hafa tapað leiknum þar sem leikmenn virtust ekki tilbúnir í byrjun leiksins.

„Hann sýndi á köflum hvað býr í honum á undirbúningstímabilinu. Það er frábært að vera með leikmann eins og hann í liðinu,“ sagði Frank Lampard um Eden Hazard eftir 2-0 sigurinn á Wigan í dag. Lampard skoraði seinna mark Chelsea úr vítaspyrnu eftir að Hazard var felldur í teignum en Hazard lagði einnig upp fyrra mark Chelsea í leiknum.

„Það var mjög gott að skora tvö mörk strax í byrjun leiks og við stjórnuðum leiknum vel. Eden Hazard sýndi úr hverju hann er gerður í dag. Það var unun að horfa á hann spila,“ sagði Roberto Di Matteo þjálfari Chelsea.

Roberto Martinez þjálfari Wigan var einnig ánægður með sitt lið fyrir utan byrjun leiksins augljóslega.

„Við vorum slakir í byrjun. Það vantaði alla ákefð í leikmenn og við byrjuðum leikinn eins og hann væri liður í undirbúningstímabilinu og ef maður gerir það í þessari deild þá er manni refsað grimmilega. Ég gæti ekki verið ánægðari með hvernig við brugðumst við. Þetta var mikil prófraun, ekki bara á tæknilega getu okkar liðs heldur einnig karakterinn sem við sýndum svo vel,“ sagði Martinez.

Victor Moses leikmaður Wigan hefur verið orðaður við Chelsea í sumar og vildi Martinez að leikmannaglugginn myndi loka fyrir fyrstu umferð tímabilsins.

„Tilboð Chelsea var ekki takt við okkar verðmat á leikmanninum. Þetta er slæmt fyrir leikmanninn og okkur. Leikmannaglugginn ætti ekki að vera opinn á meðan tímabilið er í gangi. Öll lið finna fyrir þessu. Þetta er ekki gott fyrir stuðningsmennina eða leikmenn liðanna. Leikmenn eru mannlegir og við ættum að huga betur að mannlegu hliðinni í fótbolta,“ sagði Martinez að lokum.