Mancini: Þarf að styrkja liðið

Viðbrögð Roberto Mancini stjóra Manchester City eftir 3-2 sigurinn á Southampton eru að liðið sé ekki í sínu besta formi og hann segist þurfa að styrkja liðið fyrir átökin í vetur.

„Við erum ekki 100%, við gerðum nokkur mistök en stóra vandamálið var að við klúðruðum fimm eða sex færum í stöðunni 1-0 og svo breyttist allt," sagði Mancini eftir leikinn.

„Við verðskulduðum að vinna leikinn. Þeir fengu engin færi í fyrri hálfleik og við fengum fjögur eða fimm ótrúleg færi. Fyrstu leikirnir gætu verið svona því við erum ekki 100%. Ég held að við þurfum að styrkja liðið," sagði Mancini sem sagðist engar upplýsingar geta veitt um meiðsli Sergio Aguero. Hann verði skoðaður nánar og upplýsingar ættu að liggja fyrir eftir tvo daga.

Samir Nasri sem tryggði Manchester City sigurinn sagði leikmenn liðsins ekki hafa misst trúna þó liðið hafi lent undir þegar rétt rúmar 20 mínútur voru eftir af leiknum.

„Við fórum ekki á taugum. Þetta var áfall en við sögðum, við getum þetta, við gerðum þetta í mikilvægasta leiknum á síðasta tímabili en næst væri betra að vinna eitt eða tvö núll," sagði Nasri.

„Það var stór ákvörðun að byrja ekki með Ricky Lambert en leikskipulagið gekk út á að eiga möguleika á að fá eitthvað út úr leiknum. Okkar markmið er að vinna og við þurfum að finna leiðir til að vinna leiki," sagði Nigel Adkins þjálfari Southampton eftir leikinn.