Heiðar Helguson genginn til liðs við Cardiff

Framherjinn Heiðar Helguson hefur gengið frá eins árs samningi við velska knattspyrnufélagið Cardiff City. Heiðar staðfesti þetta í samtali við íþróttadeild Stöðvar 2 í dag.

Heiðar fer á frjálsri sölu frá Queen Park Rangers en hann hefur verið á mála hjá Lundúnarfélaginu frá árinu 2009. Heiðar skoraði 28 mörk í 80 leikjum með QPR og átti stóran þátt í því að félagið vann sér sæti í ensku úrvalsdeildinni vorið 2011.

Heiðar þekkir vel til Malky MacKay, knattspyrnustjóra Cardiff. MacKay var við stjórnvölinn hjá Watford þegar Heiðar fór að láni til félagsins frá QPR árið 2009.

Hjá velska félaginu, sem leikur í b-deild enska boltans, hittir Heiðar líka fyrir íslenska landsliðsmanninn Aron Einar Gunnarsson. Cardiff komst í umspil um sæti í ensku úrvalsdeildinni á síðustu leiktíð en steinlá í umspilinu í tveimur leikjum gegn West Ham, 5-0.

Heiðar, sem verður 35 ára síðar í mánuðinum, hefur leikið sem atvinnumaður frá því hann hélt í atvinnumennsku til Lilleström árið 1998. Áður hafði hann leikið með Þrótti í næstefstu deild íslenska boltans og uppeldisfélagi sínu Dalvík í þriðju efstu deild.

Heiðar sló í gegn hjá Lilleström og var ári síðar keyptur til Watford sem þá lék í ensku úrvalsdeildinni. Hann skoraði í sínum fyrsta leik gegn Liverpool og stóð sig vel hjá félaginu þau sex ár sem hann lék með því.

Heiðar lék svo með Fulham og Bolton áður en hann var lánaður til QPR í ársbyrjun 2009. Eftir erfið meiðsli og fá tækifæri hjá Bolton lét Heiðar til sín taka hjá QPR þar sem hann hefur leikið þar til nú.

Heiðar, sem lagði landsliðsskóna á hilluna á síðasta ári, skoraði tólf mörk í 55 landsleikjum fyrir Íslandshönd. Einnig er merkilega sú staðreynd að Dalvíkingurinn hefur aldrei spilað í efstu deild íslenskrar knattspyrnu.