Parker missir af fyrsta mánuði tímabilsins - Gylfi enn mikilvægari

Scott Parker, miðjumaður Tottenham og enska landsliðsins, verður ekkert með Tottenham-liðinu fyrsta mánuðinn á nýju tímabili sem hefst eftir rúma viku. Parker er enn að jafna sig eftir aðgerð á hægri hásin og Tottenham gaf það út á heimasíðu sinni í dag að hann myndi ekki spila fyrr en í september.

„Scott Parker fór í velheppnaða aðgerð á hægri hásin. Miðjumaðurinn snýr væntanlega aftur til æfinga eftir landsleikjahléið í september," segir í fréttinni á heimasíðu Tottenham.

Scott Parker missti af nokkrum leikjum í lok síðasta tímabils en spilaði í gegnum meiðslin í öllum leikjum Englendinga á EM í sumar.

Gylfi Þór Sigurðsson er að hefja sitt fyrsta tímabil með Tottenham og það er ljóst að fjarvera Parker gerir hlutverk Gylfa Þórs enn mikilvægara á miðju liðsins.

Parker er reyndar varnarsinnaður miðjumaður en engu að síður ætti Gylfi að fá fleiri mínútur á miðjunni í fjarveru enska landsliðsmiðjumannsins.