Tottenham tapaði fyrir Valencia í kvöld

Gylfi Þór Sigurðsson spilaði fyrstu 80 mínúturnar þegar Tottenham tapaði 0-2 fyrir Valencia á Spáni í kvöld í síðasta undirbúningsleik sínum fyrir komandi tímabil.

Gylfi fór útaf á 80. mínútu en hann var með Aaron Lennon og Gareth Bale í þriggja manna línu fyrir aftan Jermaine Defoe. Gylfi komst næst því að skora strax á 10. mínútu en varnarmaður Valencia komst þá fyrir skotið hans.

Aaron Lennon fékk tvö góð færi áður en Jonas skoraði fyrra mark Valencia með þrumuskoti á 18. mínútu. Sofiane Feghouli bætti við öðru marki í seinni hálfleiknum. Tottenham-liðið var með frumkvæðið lengstum í leiknum en það voru Spánverjarnir sem skoruðu mörkin í leiknum.

Þetta var fyrsta tap Tottenham-liðsins á undirbúningstímabilinu en liðið hafði áður unnið Watford, New York Red Bulls og Stevenage og síðan gert jafntefli við LA Galaxy og Liverpool.