Steven Pienaar aftur til Everton

Suður-afríski miðjumaðurinn Steven Pienaar hefur gengið frá félagaskiptum til Everton. Liverpool Echo greinir frá þessu.

Pienaar stóðst í dag læknisskoðun og í kjölfarið birti heimasíða umboðsmanns hans frétt þess efnis að Pienaar hefði skrifað undir fjögurra ára samning.

Pienaar varði síðari hluta síðustu leiktíðar á láni hjá Everton frá Tottenham en kappinn gekk einmitt til liðs við Lundúnarfélagið frá Everton í janúar 2011.

Miðjumaðurinn mátti sætta sig við töluverða bekkjarsetu hjá Tottenham og sagði í lok leiktíðar vilja vera áfram hjá Everton.

Kaupverðið hefur ekki verið gefið upp en Sky segir það vera 4,5 milljónir punda eða sem nemur tæplega 900 milljónum íslenskra króna.

Reiknað er með því að Pienaar verði kynntur til sögunnar sem leikmaður Everton, á ný, á blaðamannafundi á morgun.