West Ham búið að bjóða í Andy Carroll

West Ham United, nýliðarnir í ensku úrvalsdeildinni, hafa gert Liverpool tilboð í enska landsliðsframherjann Andy Carroll, samkvæmt heimildum BBC. Carroll myndi fara á láni til að byrja með en West Ham gengi síðan frá kaupunum næsta sumar.

BBC hefur heimildir fyrir því að Andy Carroll sjálfur sé ekki alltof spenntur fyrir því að fara til West Ham en hingað til hafa enskir fjölmiðlar skrifað mikið um hugsanlega endurkomu hans til Newcastle.

Kauptilboð West Ham er eitthvað í kringum fimmtán milljónir punda sem myndi gera

Carroll að dýrasta leikmanninum í sögu West Ham. Liverpool þarf væntanlega að sætta sig við mikið tap á Carroll en ætlar ekki að láta hann fara fyrir minna en 20 milljónir punda.

Brendan Rodgers, nýr stjóri Liverpool, er ekki með Carroll inn í framtíðarplönum sínum hjá félaginu en þessi hávaxni strákur hefur ekki náð að standa undir þeim 35 milljónum punda sem Liverpool borgaði fyrir hann í janúar 2011.