King: Meiðslasaga mín hófst eftir tæklingu frá Rory Delap fyrir 13 árum

Enski miðvörðurinn Ledley King lagði knattspyrnuskóna á hilluna á dögunum en hann hefur glímt við erfið meiðsli nánast allan ferilinn.

King var í ítarlegu viðtali við The Sun nú á dögunum þar sem hann fer í gegnum ferilinn. Þar greinir King frá því að hann hafi byrjað að finna fyrir eymslum í hné eftir harkalega tæklingu frá Rory Delap árið 1999.

Delap var á þeim tíma leikmaður Derby County en Ledley King var aðeins 19 ára þegar hann kom inná sem varamaður fyrir Tottenham. King hafði aðeins verið inná vellinum í eina mínútu þegar Delap renndi sér í King.

Þessi 19 ára leikmaður þurfti að gangast undir erfiða aðgerð á hné eftir leikinn og þá má segja að meiðslasaga Ledley King hafi byrjað.

„Þegar ég hugsa til baka þá er það magnað hvað ég náði að spila marga leiki eftir þetta atvik," sagði King.

„Þetta gerðist í fyrsta leik mínum fyrir aðallið Tottenham en þá var ég að spila sem miðjumaður."

„Ég fékk boltann nokkrum andartökum eftir að ég hafði komið inná og þá fæ ég Delap á fullri ferð inn í mig, þetta fór gjörsamlega með hnéð á mér og ég hef varla náð mér síðan. Þetta gerðist fjórum dögum eftir 19 ára afmælið mitt."