Leikkona úr Desperate Housewives látin

Leikkonan Kathryn Joosten er látin sjötíu og tveggja ára að aldri en banamein hennar var lungnakrabbamein. Joosten er Íslendingum vel kunn úr hinum sívinsælu þáttum, Desperate Housewives, en þar lék hún fúllynda nágrannann Karen McCluskey.

Joosten greindist fyrst með krabbamein fyrir ellefu árum síðan. Á meðan hún barðist við veikindin hefur hún hlotið tvenn Emmy verðlaun, bæði fyrir leik sinn í þáttunum fyrrnefndu.

Þá lék hún einnig í gæðaþáttunum Vesturálmunni, eða West Wing, sem voru sýndir í Ríkisútvarpinu fyrir nokkrum árum síðan. Joosten hóf feril sinn sem leikkona þegar hún var 42 ára gömul. Áður starfaði hún sem hjúkrunarkona á geðsjúkrahúsi.