Dave Whelan er grínisti

Ian Ayre, framkvæmdastjóri Liverpool, er allt annað en ánægður með Dave Whelan, stjórnarformann Wigan, og er byrjaður að kalla hann grínista vegna hegðunar sinnar í stjóraleit Liverpool.

Whelan var óspar á upplýsingagjöf til fjölmiðla þegar Liverpool var í viðræðum við Roberto Martinez, stjóra Wigan, og hélt því meðal annars fram að Martinez hefði verið boðin stjórastaðan.

"Okkar markmið var allan tímann að vera með almennilega skoðun á því hvern við vildum og ætluðum við að vinna á faglegan hátt. Okkur fannst við gera allt rétt. Við ræddum fyrst við félög þeirra stjóra sem við vildum ræða við og svo framvegis," sagði Ayre.

"Það voru því mikil vonbrigði að fylgjast með Dave Whelan stela senunni með hjálp Sky Sports og annarra fjölmiðla. Ég hélt alltaf að John Bishop væri aðalgrínistinn á Wigan-svæðinu en Whelan hefur algjörlega tekið við keflinu af honum."

Ayre neitaði því síðan að Liverpool hefði boðið Martinez starf knattspyrnustjóra.