Alan Hansen fór illa út úr EM spá sinni

Alan Hansen, knattspyrnusérfræðingur BBC sjónvarpsstöðvarinnar, fór illa út úr spá sinni um hvaða lið myndu hafna í fjórum efstu sætunum á EM.

Hansen, sem hefur getið sér gott orð í markaþáttunum „Match of the day" á BBC spáði Spánverjum, Þjóðverjum, Hollendingum og Portúgölum sæti í undanúrslitum. Vandamálið er hins vegar það að þrjú síðastnefndu liðin eru í sama riðli og því ljóst að aðeins tvö þeirra gætu komist svo langt.

Spá Hansen sem birt var á vef BBC en síðar leiðrétt má sjá hér. Hansen verður í teymi BBC á EM sem hefst á föstudaginn.

Breskum sparkspekingum leiðist ekki að gera grín að Hansen. Frægustu ummæli kappans, sem gerði garðinn frægan á sínum tíma í gullaldarliði Liverpol, hafði litla trú á Manchester United haustið 1995.

United-liðið hafði misst nokkra sterka leikmenn og ljóst að ungir leikmenn á borð við Gary Neville, David Beckham, Paul Scholes og Nicky Butt myndu spila stórt hlutverk í liðinu. Hansen leist ekkert á möguleika United liðsins og sagði: „Þú vinnur ekki til neinna verðlauna með lið fullt af krökkum."

Skemmst er frá því að segja að United vann tvöfalt, bæði deild og bikar.