Villas-Boas: Þú verður að spyrja eigandann

Andre Villas-Boas er í slæmri stöðu eftir að lið hans, Chelsea, tapaði í gær fyrir West Brom í ensku úrvalsdeildinni. Gengi Chelsea upp á síðkastið hefur verið slæmt og Villas-Boas sagður valtur í sessi.

„Við vorum bara ekki nógu góðir. Þeir voru á undan í alla bolta og miklu, miklu betri en við í dag," sagði Villas-Boas.

Hann segir óvíst hvort að það myndi hjálpa til að finna fyrir opinberum stuðningi frá eiganda og yfirstjórn félagsins. „Nei, ég held ekki. Við verðum bara að halda áfram að sinna okkar starfi og gera betur - leikmenn, starfsmenn og knattspyrnustjóri."

„Það er alltaf pressa á okkur og við verðum að standa okkur. Það var mjög gott að vinna Bolton um daginn en nú verðum við að takast á við þetta tap og vinna okkur úr því. Við höfum nú þrjá daga fyrir bikarleikinn gegn Birmingham og eins og er erum við ekki nálægt okkur besta."

Hann vildi þó ekkert ræða um starfsöryggi sitt. „Ég get ekki svarað þessari spurningu. Þú verður að spyrja eigandann."