Wenger: Uxinn á eftir að verða flottur miðjumaður

Arsene Wenger, stjóri Arsenal, sér fyrir sér að hinn stórefnilegi leikmaður félagsins, Alex Oxlade-Chamberlain, muni verða miðjumaður hjá félaginu í framtíðinni.

Oxlade-Chamberlain, eða Uxinn eins og hann er oftast kallaður, hefur mest leikið út á kanti hjá liðinu en kom inn í miðjuna gegn AC Milan í Meistaradeildinni og stóð sig afar vel.

"Ég held að hann sé ekki alveg tilbúinn í að spila sem miðjumaður en hann mun þróast í að verða miðjumaður," sagði Wenger um hinn 18 ára gamla Uxa.

"Hann mun fá fleiri tækifæri á miðjunni en mun þó aðallega spila þar sem við þurfum á honum að halda hverju sinni. Aðalmálið núna er að hann haldi áfram að þróa sinn leik.

"Hann á enn eftir að læra mikið og við þurfum að vinna vel í hans málum. Það mun koma með mikilli vinnu. Það er enginn stjarna eftir fimm eða tíu leiki. Við skulum tala aftur saman þegar hann er búinn að spila 100 leiki."