Nýi Belginn hjá Chelsea: Öll fjölskyldan heldur með Liverpool

Chelsea keypti í gær Belgíumanninn Kevin De Bruyne frá Genk en þessi tuttugu ára miðjumaður var strax lánaður aftur til Genk þar sem að hann mun klára tímabilið. Chelsea borgaði sjö milljónir punda fyrir leikmanninn eða jafnmikið og félagið borgaði fyrir Gary Cahill.

„Ég er mjög ánægður með þetta en öll fjölskyldan heldur samt með Liverpool," viðurkennir Kevin De Bruyne sem hefur spilað mjög stórt hlutverki hjá Genk en hann er á sínu þriðja alvöru tímabili með liðinu.

De Bruyne var með 5 mörk og 16 stoðsendingar í 32 leikjum þegar Genk vann belgíska meistaratitilinn á síðasta tímabili.

„Mamma mín er hálfensk og við höfum alltaf fylgst vel með enska boltanum. Nú er maður samt hættur að vera stuðningsmaður og hefur metnað að ná sem lengst í boltanum," sagði De Bruyne.

Hann reiknar einnig með því að vera lánaður á næsta tímabili. „Það er bara eðlilegt að vera lánaður á fyrsta tímabilinu en ég býst þó við því að fara til liðs sem er betra en Genk," sagði De Bruyne.