Wenger ætlar að ræða framtíð Wilshere í kvöld | Brotinn á nýjum stað

Jack Wilshere, miðjumaðurinn efnilegi hjá Arsenal, er ekkert að fara spila með liði sínu á næstunni eftir að það kom í ljós að hann er fótbrotinn á hægri fæti. Brotið er á öðrum stað en meiðlsin sem hafa haldið honum frá æfingum og keppni allt þetta tímabil.

Arsenal hefur staðfest þessar fréttir en Arsene Wenger, stjóri liðsins, mun ræða framtíðarhorfur Wilshere eftir leikinn á móti Bolton í kvöld.

Jack Wilshere ökklabrotnaði með enska landsliðinu síðasta sumar og í framhaldinu hefur hann orðið fyrir hverju áfallinu á fætur öðru.

Arsenal var að vonast eftir því að Wilshere væri byrjaður að spila aftur í þessum mánuði og leikmaðurinn sjálfur taldi endurhæfinguna ganga framar vonum.

Það er ekki ljóst hversu lengi Wilshere verður frá keppni vegna þessara nýju meiðsla en eftir þessar slæmu fréttir er væntanlega hægt að fara afskrifa algjörlega þetta tímabil og þar með Evrópumótið í sumar.