John Terry er bálreiður og í sárum

Enskir fjölmiðlar segja að John Terry sé í sárum eftir að stjórn enska knattspyrnusambandsins ákvað í morgun að taka af honum fyrirliðaband enska landsliðsins.

Er þetta tímabundið úrræði, þar til að niðurstaða í réttarhöldum Terry fæst en hann er sakaður um að hafa verið með kynþáttaníð í garð Anton Ferdinand, leikmann QPR, í leik gegn Chelsea í haust.

Terry er þó enn fyrirliði Chelsea en það tilkynnti Andre Villas-Boas, stjóri liðsins, í dag.

Samkvæmt enska blaðinu The Guardian mun Terry ekki einungis vera í sárum heldur einnig bálreiður út í enska knattspyrnusambandið. Hvort að hann muni áfram gefa kost á sér í liðið verður að koma í ljós en enska sambandið segir hann enn vera gjaldgengan.

Þetta er í annað sinn sem að fyrirliðastaðan er tekin af Terry. Í hitt skiptið var það vegna framhjáhalds hans með fyrrverandi maka Wayne Bridge, fyrrum leikmanns Chelsea og enska landsliðsins.

Bridge hætti að gefa kost á sér í enska landsliðið vegna málsins. Terry neitaði ávallt sök í málinu, rétt eins og hann hefur gert nú. Eftir að fyrirliðabandið var tekið af honum í fyrra skiptið hélt hann engu að síður áfram að spila með liðinu sem óbreyttur leikmaður.

Í grein The Guardian er því einnig haldið fram að Terry hafi gert sér grein fyrir því í aðdraganda æfingaleiks Englands og Svíþjóðar í nóvember síðastliðnum að það væru ekki allir liðsfélagar hans í enska landsliðinu ánægðir með hans framgöngu, sér í lagi þeir leikmenn sem eru dökkir á hörund. Uppákoman með Ferdinand hafi veikt stöðu hans í hópnum til muna.

Rio Ferdinand hefur lýst því yfir að hann hafi ekki áhuga á að taka aftur við fyrirliðastöðu enska landsliðsins. Talið er líklegast að Steven Gerrard verði gerður að fyrirliða nú.