Tvíburar sameinast á ný hjá Blackburn

Sænsku tvíburarnir Martin og Marcus Olsson eru orðnir liðsfélagar á nýjan leik eftir að enska úrvalsdeildarfélagið Blackburn Rovers ákvað að semja við Marcus Olsson. Martin Olsson hefur spilað með Blackburn frá 2006.

Marcus Olsson hefur alla tíð spilað í sænsku deildinni með Halmstad og var í viðræðum við Djurgarden og Viking Stavanger. Hann hefur nú skrifað undir tveggja og hálfs árs samning við Blackburn.

Marcus sagði að bróðir sinn hafi verið í sjokki þegar hann heyrði fyrst af því að þeir yrðu samherjar á ný. „Það var mjög óvænt þegar ég frétti af áhuga þeirra en ég þurfti ekki að hugsa mig lengi um," sagði Marcus við Aftonbladet en eru þeir að keppa um sömu stöðu?

„Hann er vinstri bakvörður en ég er vinstri kantmaður. Við blómstrum saman inn á vellinum og það verður ekkert vandamál. Við höfum reyndar ekki spilað saman síðan í sextán ára liðinu hjá Högaborg," sagði Marcus.

Olsson-tvíburarnir eru fæddir 17. maí 1988 í Gävle í Svíþjóð og verða því 24 ára í vor. Faðir þeirra er sænskur en móðir þeirra var frá Kenía. Jessica systir þeirra er síðan kærasta þýska körfuboltamannsins Dirk Nowitzki.