Kaupir Tottenham Rodallega eftir leikinn við Wigan í kvöld?

Hugo Rodallega hefur verið orðaður við Tottenham í þessum félagsskiptaglugga og svo gæti farið að gengið verði frá kaupunum á framherjanum áður en glugginn lokar á miðnætti í kvöld. Hlutirnir gætu gerst hratt því Wigan mætir einmitt Tottenham í ensku úrvalsdeildinni í kvöld.

Enskir miðlar hafa bent á þann möguleika að Hugo Rodallega spili leikinn og svo verði gengið frá félagsskiptunum eftir hann. Leiknum lýkur um 21.30 og því myndu félögin hafa tvo og hálfan tíma til að ganga frá sölunni.

Wigan hefur þegar hafnað fjögurra milljóna punda boði í leikmanninn en samningur hans rennur út í sumar og því er þetta síðasti möguleikinn að fá eitthvað fyrir leikmanninn.

Hugo Rodallega er 26 ára Kólumbíumaður sem hefur spilað með Wigan frá árinu 2009. Hann hefur skorað 24 mörk í 96 leikjum í ensku úrvalsdeildinni með Wigan en aðeins þó bara 2 mörk í 15 leikjum á þessu tímabili.