Cardiff enn í þriðja sæti

Cardiff var ekki langt frá því að komast upp í annað sæti ensku B-deildarinnar í kvöld en liðið gerði þá jafntefli við Southampton í toppslag. Topplið West Ham steinlá fyrir Ipswich á útivelli.

Aron Einar spilaði allan leikinn sem lyktaði með 1-1 jafntefli. Cardiff komst yfir með marki Craig Conway en Kevin McNaughton jafnaði metin fyrir Southampton með marki úr vítaspyrnu í seinni hálfleik.

Aron Einar fékk svo ágætt færi undir lok leiksins en skot hans hitti ekki á mark heimamanna.

Hermann Hreiðarsson lék allan leikinn með Coventry sem tapaði fyrir Blackpool, 2-1, á grátlegan máta. Coventry komst yfir en Blackpool jafnaði metin á 84. mínútu áður en Gary Taylor-Fletcher tryggði liðinu sigur með marki á fjórðu mínútu uppbótartíma. Coventry er því enn í botnsæti deildarinnar.

Ipswich var í fallsæti fyrir leiki kvöldsins og kom því 5-1 sigur liðsins á toppliði West Ham gríðarlega á óvart. Síðarnefnda liðið heldur þó toppsætinu í bili en er nú aðeins tveimur stigum á undan Southampton og þremur á undan Cardiff.

Tvö efstu liðin komast beint upp í ensku úrvalsdeildina en liðin í 3.-6. fara í umspil um eitt laust sæti.

Úrslit kvöldsins:

Barnsley - Derby 3-2

Blackpool - Coventry 2-1

Crystal Palace - Brighton 1-1

Hull - Doncaster 0-0

Ipswich - West Ham 5-1

Leeds - Birmingham 1-4

Millwall - Watford 0-2

Nott. Forest - Burnley 0-2

Southampton - Cardiff