Gibson: Fæ örugglega símtöl frá leikmönnum United

Darron Gibson var hógvær í viðtölum eftir að hann tryggði sínum mönnum í Everton 1-0 sigur á Manchester City í ensku úrvalsdeildinni í kvöld. Sjálfsagt voru stuðningsmenn Manchester United ekki síður ánægðir með hann en Everton-menn enda tókst United að jafna City að stigum á toppi deildarinnar.

Gibson var seldur fyrr í þessum mánuði frá United til Everton fyrir hálfa milljón punda. „Strákarnir voru duglegir í kvöld og það borgaði sig. Allir sinntu varnarvinnunni samviskusamlega, frá aftasta manni til Denis Stracqualursi í fremstu víglínu," sagði Gibson eftir leikinn.

„Það var gott að skora mitt fyrsta mark og ég á von á því að fá nokkur símtöl frá mínum gömlu liðsfélögum í kvöld," bætti hann við.

Rio Ferdinand, leikmaður United, ætlar reyndar að láta nægja að senda SMS. „Ég mun senda honum skilaboð og óska honum til hamingju. Gibbo er frábær leikmaður. Við áttum aldrei von á þessum úrslitum en erum ánægðir með þau."