Félagaskipti Zamora til QPR staðfest

Bobby Zamora hefur skrifað undir tveggja og hálfs árs samning við QPR sem keypti hann í kvöld frá Fulham fyrir fjórar milljónir punda.

Þetta hefur legið í loftinu í dag en fyrr í dag fékk QPR annan sóknarmann, Djibril Cisse, frá Lazio á Ítalíu. Það er því mun meiri samkeppni um stöður í byrjunarliðinu fyrir Heiðar Helguson, íþróttamann ársins og markahæsta mann QPR á tímabilinu.

Hughes þekkir vel til Zamora enda lék sá síðarnefndi undir stjórn hans hjá Fulham á síðasta tímabili. „Bobby er leikmaður sem lætur hluti gerast inn á vellinum. Við þurftum á leikmanni eins og honum að halda og ég er hæstánægður með þetta," sagði Hughes í kvöld.