Van der Vaart skaut Tottenham áfram í enska bikarnum

Tottenham varð í kvöld fyrsta liðið til þess að komast í sextán liða úrslit enska bikarsins eftir 1-0 útisigur á b-deildarliðnu Watford á Vicarage Road. Hollendingurinn Rafael van der Vaart skoraði sigurmarkið undir lok fyrri hálfleiks.

Tottenham hefur oft leikið betur en í kvöld en liðið komst áfram og aftur á sigurbraut eftir tapið á móti Manchester City í deildinni um síðustu helgi. Tapið á móti City var fyrsta tap Tottenham-manna í tíu deildar- og bikarleikjum.

Watford-liðið stóð sig vel og var nálægt því að jafna metin í seinni hálfleiknum en liðið er aðeins í 18. sæti í ensku b-deildinni.

Harry Redknapp, stjóri Tottenham, ákvað að hvíla Gareth Bale og byrja með Aaron Lennon á bekknum. Það vantaði því mikið upp á hið frábæra kantspil Tottenham-liðsins í þessum leik og á endanum var það klaufamark sem réði úrslitum í leiknum.

Rafael van der Vaart skoraði eina mark leiksins á 42. mínútu með skoti af 25 metra færi en Scott Loach, markvörður Watford, átti þar að gera miklu betur.