Fabregas: Enginn annar en Henry gæti skorað svona mark

Cesc Fabregas, fyrrum leikmaður Arsenal og núverandi leikmaður Barcelona, er einn af fjölmörgum stórstjörnum fótboltaheimsins sem hafa tjáð sig um endurkomu Thierry Henry í Arsenal-liðið í gær.

„Var að sjá markið hans Henry frá því í gærkvöldi. Enginn annar en Henry gæti skorað svona mark. Sérstakir leikmenn fyrir sérstakar stundir. Frábært," skrifaði Cesc Fabregas inn á twitter-síðuna.

Henry skoraði markið sitt á "klassískan" hátt, fékk sendingu frá Song, lagði boltann fyrir sig og sendi hann síðan í fjærhornið. Þetta var 227. mark hans fyrir Arsenal en enginn hefur skorað fleiri mörk fyrir félagið. Henry kom inn á sem varamaður á 68. mínútu á móti Leeds í gær og skoraði sigurmarkið tíu mínútum síðar.

Theirry Henry fór frá Arsenal til Barcelona árið 2007 og Fabregas fór sömu leið í haust. Fabregas hefur síðan látið hafa það eftir sér að hann gæti spilað aftur fyrir Arsenal í framtíðinni og endurkoma Henry í gær hefur eflaust ýtt undir þá drauma meðal stuðningsmanna Arsenal.