Van Persie hitti Maradona í Dúbaí

Langþráður draumur rættist hjá Hollendingnum Robin Van Persie, leikmanni Arsenal, í gær er hann hitti besta knattspyrnumann allra tíma, Diego Armando Maradona.

Van Persie er í fríi í Dúbaí og kom Maradona á óvart er hann birtist óvænt á æfingu hjá Al Wasl sem Maradona þjálfar.

"Ég hef alltaf dáð Maradona enda einn besti knattspyrnumaður allra tíma. Það hefði ekkert verið varið í þessa ferð til Dúbaí ef ég hefði ekki náð að hitta kallinn," sagði Van Persie.

Maradona var ánægður með heimsóknina. Spjallaði við Van Persie og svo spörkuðu þeir bolta á milli áður en stillt var upp í fjölskyldumyndatöku með argentínska goðinu.

"Van Persie er stjörnuleikmaður og einnig með sterkan karakter sem ég ber virðingu fyrir. Hann er mikil fyrirmynd annarra leikmanna," sagði Maradona auðmjúkur.