Skrtel skrifaði undir nýjan samning við Liverpool

Slóvakíski miðvörðurinn Martin Skrtel er búinn að skrifa undir nýjan langtímasamning við Liverpool en þessi 27 ára leikmaður hefur verið í samningaviðræðum við Liverpool í nokkurn tíma. Það er ekki gefið upp hversu langur samningurinn er.

Martin Skrtel var kosinn leikmaður ársins hjá Liverpool á síðustu leiktíð og var orðaður við Manchester City og Fiorentina í sumar.

Skrtel kom til Liverpool frá Zenit St Petersburg árið 2008 og kostaði enska liðið 6 milljónir punda.

„Það var umræða um mína framtíð eftir síðasta tímabil en það var alltaf í forgangi hjá mér að skrifa undir nýjan samning við Liverpool. Ég stoltur af því að spila með Liverpool og þessum liðsfélögum en nokkrir þeirra eru í hópi bestu knattspyrnumanna heims," sagði Martin Skrtel á heimasíðu Liverpool.

„Ég er búinn að vera hér í næstum því fjögur og hálft ár og ég og fjölskyldan mín höfum notið þess að vera hér. Það hefur mikið breyst á þessum tíma og nú með nýjum stjóra þá erum við tilbúnir að fara að skrifa nýja sögu. Ég vil vera hluti af henni," sagði Skrtel.