Rio Ferdinand fékk 8,4 milljóna sekt fyrir óviðeigandi skrif á twitter

Rio Ferdinand leikmaður Manchester United er manna duglegastur að skrifa inn á twitter en miðvörðurinn fór yfir strikið á dögunum og hefur nú verið sektaður um 45 þúsund pund af sérstökum dómstóli. Enska sambandið gaf þetta út í dag.

"Nefndin komst að þeirri niðurstöðu að skrifin voru óviðeigandi og komu óorði á leikinn. Auk þessa taldi nefndin að í skrifunum hafi mátt finna vísanir í uppruna, litarhátt og kynþátt viðkomandi," stóð í fréttatilkynningunni frá enska sambandinu.

Rio Ferdinand gerðist sekur um þessi óviðeigandi skrif í kjölfarið á því að dómstólar sýknuðu John Terry af kynþáttarníði gagnvart bróður hans Anton Ferdinand. Rio kallaði Ashley Cole, liðsfélaga John Terry hjá Chelsea, þá "choc-ice" (ís með súkkulaði dýfu) en Cole var vitni í Terry-málinu.

Rio Ferdinand varði skrifin sín inn á twitter-síðu sinni daginn eftir þar sem hélt því fram að ummælin væru ekki kynþáttalegs eðlis heldur aðeins slanguryrði um mann sem sé falskur. Nefnin var hinsvegar ekki á sama máli.