Steve Clarke ekkert fúll út í Liverpool

Steve Clarke, nýr stjóri West Brom, segist ekki bera neinn kala til Liverpool þrátt fyrir að hafa verið rekinn frá félaginu í sumar. Clarke var aðstoðarmaður Kenny Dalglish í eitt og hálft tímabil en yfirgaf félagið þegar Brendan Rodgers tók við.

Clarke tók við liði West Bromwich Albion af Roy Hodgson í byrjun júní og örlögin sáu svo til þess að Liverpool og West Brom mætast í fyrstu umferð ensku úrvalsdeildarinnar sem fer af stað á morgun. Báðir stjórar eru því að stýra liðunum í fyrsta sinn í deildinni.

„Ég get ekki kvartað undan neinu hjá Liverpool. Ég átti frábæran tíma þar og eftir laugardaginn mun ég óska þeim alls hins besta út tímabilið," sagði Steve Clarke á blaðamannafundi fyrir leikinn á The Hawthorns á morgun.

Þetta er fyrsta aðalstjórastarf Clarke á ferlinum en hann hefur áður verið aðstoðarmaður hjá Newcastle United, Chelsea, West Ham United og svo að sjálfsögðu Liverpool.