Brendan Rodgers: Assaidi passar fullkomlega inn í okkar leikstíl

Liverpool hefur formlega gengið frá kaupunum á Marokkómanninum Oussama Assaidi frá hollenska félaginu Heerenveen en þessi 24 ára vængmaður hefur þegar leikið 22 landsleiki fyrir Marokkó. Brendan Rodgers, stjóri Liverpool, tjáði sig um nýja manninn á blaðamannafundi í dag.

„Við erum mjög ánægðir með að fá hann. Þetta er ungur leikmaður sem hefur staðið sig mjög vel í hollensku deildinni undanfarin tímabil," sagði Brendan Rodgers.

„Hann passar fullkomlega inn í okkar leikstíl. Þetta er mjög spennandi leikmaður sem er mjög góður maður á móti manni. Ég tel að þetta sé leikmaður sem mun kveikja í áhorfendum en við erum samt ekki að búast við of miklu of snemma," sagði Rodgers.

„Hann þarf sinn tíma til að aðlagast enska boltanum en það er ánægjulegt að hann hafi verið til í að koma til okkar frekar en að fara til annarra áhugasamra félaga," sagði Rodgers.