Mancini: Erfiðara að verja titilinn en vinna hann

Roberto Mancini, stjóri Man. City, segir að það verði erfiðara að verja enska meistaratitilinn en að vinna hann og var nú frekar erfitt fyrir liðið að vinna titilinn á síðustu leiktíð.

Mancini viðurkennir að það hafi verið vandræðagangur á hans liði í upphafi leiktíðar en hann segir að allt sé á réttri leið.

"Við spiluðum oft vel í fyrra en höfum ekki náð að fylgja því nógu vel eftir. Það er eðlilegt enda alltaf erfiðara að verja titilinn," sagði Mancini.

"Það er aukin pressa í hverjum leik því allir búast við að liðið spili eins vel og stundum er það bara ómögulegt. Við höfum átt í smá vandræðum en verðum betri.

"Við höfum skipt út nokkrum leikmönnum þannig að ég er ekkert hissa á smá vandræðagangi. Þetta hefur ekki verið neitt stórslys samt."