Allt viðtal Sky-fréttastofunnar við Eið Smára

Eiður Smári Guðjohnsen var í viðtali við Sky-fréttastofuna daginn eftir að hann fór á láni frá Stoke til Fulham. Íþróttadeild Stöðvar 2 hefur fengið þetta viðtal frá Sky og birti brot úr því í kvöldfréttum sínum.

„Það var dagur óvissunnar og ég átti ekki marga möguleika í stöðunni. Ég vil ekkert fara nánar yfir það en þegar upp var staðið þá tókst að klára þetta og ég hlakka til seinni hluta tímabilsins," sagði Eiður Smári í þessu sjónvarpsviðtali á Sky Sports.

„Ég vona núna að mér takist að koma ferlinum aftur í gang. Fulham sýndi mér áhuga og það skipti miklu máli. Ég þekki nokkra hér síðan ég spilaði með Chelsea. Ég er hrifinn af leikstíl liðsins og metnaði félagsins fyrir að klára tímabilið vel," sagði Eiður.

„Það verður augljóslega hörð samkeppni um sæti í liðinu en ég mun gera mitt besta að ná fram mínu besta og reyna að hjálpa liðinu," sagði Eiður.

„Það voru margar ástæður fyrir því að hlutirnir gengu ekki upp hjá Stoke en ég vil ekki fara neitt dýpra í þær. Aðalástæðan var sú að leikstíll liðsins hentaði mér ekki. Það er kannski aðeins munur á því hvernig ég vill spila fótbolta og hvernig fótolta Soke spilar," sagði Eiður Smári í þessu viðtalið við Sky.

„Mark Hughes þurfti ekki að selja mér það að koma til Fulham. Staða mín hjá Stoke var ekki góð og hann gaf mér tækifæri til að koma hingað og reyna að hrífa hann. Það býr mikið í þessu liði og staða liðsins í töflunni gefur ekki rétta mynd af styrk þess. Ég tel því að við eigum að horfa upp töfluna," sagði Eiður Smári.

„Vonandi næ ég að skora einhver mörk til loks tímabilsins en þetta mun fyrst og fremst snúast um það að hjálpa liðinu hvort sem ég er að skora mörk sjálfur eða leggja þau upp fyrir aðra," segir Eiður en hann tjáir sig um fleira í viðtalinu sem má skoða hér fyrir ofan.