Poyet: Enska deildin búin að vera slök á þessu tímabili

Úrúgvæmaðurinn Gus Poyet, fyrrum miðjumaður Chelsea og Tottenham, er ekki hrifinn af fótboltanum sem bestu liðin í ensku úrvalsdeildinni hafa boðið upp á þessu tímabili. Það að United sé enn taplaust er því bara að hans mati dæmi um slaka frammistöðu mótherja þeirra í deildinni.

„Ég get auðveldlega gagnrýnt spilamennskuna í ensku úrvalsdeildini á þessu tímabili," sagði Gus Poyet í viðtali við Reuters í dag. Hann er nú stjóri hjá enska C-deildarliðinu Brighton and Hove Albion.

„Ég veit það vel að sumir eru ekki sammála mér en ég tel að þetta sé eitt versta tímabilið í ensku úrvalsdeildinni á síðustu árum. Deildin er kannski jafnari og meira spennandi en um leið er ekkert lið að skara sérstaklega fram úr,"sagði Poyet.

„Bestu rökin fyrir þessu eru að skoða lið United. Liðið er langt frá sínu besta en er samt í efsta sætinu. Þeir eiga skilið að vera á toppnum en ef þeir geta verið í forustu án þess að spila sinn besta leik hvað segir það þá um restina af deildinni," sagði Poyet.

„Það er líka hægt að benda á aðrar deildir. Barcelona er á toppnum á Spáni af því að þeir eru búnir að vera frábærir. Ef við förum til annarra landa eins og Ítalíu þá er saman sagan. Liðin sem eru á toppnum eru þar af því að þau eru að spila góðan fótbolta," sagði Poyet og hann hefur ekki verið hrifinn af toppleikjum tímabilsins.

„Að leik Arsenal og Chelsea undanskildum þá voru toppleikirnir, eins og leikurinn á milli Manchester-liðanna og leikurinn á milli Arsenal og Manchester City, allir skelfilegir. Maður býst við meira af enska boltanum og enska úrvalsdeildin þarf að fara að passa sig," sagði Poyet.