Ryan Babel í læknisskoðun hjá Hoffenheim

Það lítur allt út fyrir að Hollendingurinn Ryan Babel verði fljótlega orðinn liðsfélagi Gylfa Þórs Sigurðssonar hjá þýska liðinu Hoffenheim. Liverpool er tilbúið að selja leikmanninn fyrir sjö milljónir punda og hann er samkvæmt heimildum Sky Sports í læknisskoðun hjá Hoffenheim.

Þessi 24 ára gamli framherji á enn eftir að ganga frá persónulegum samingi sínum við þýska liðið en Þjóðverjarnir vilja fá Babel til að leysa af Demba Ba sem fór í verkfall til þess að komast frá liðinu. Ba var kominn langleiðina til Stoke þegar hann féll á læknisskoðun en hann mun væntanlega ekki spila aftur fyrir Hoffenheim.

Babel var að reyna að komast til hollenska liðsins Ajax eftir að hafa fengið afar fá tækifæri á þremur tímabilum með Liverpool en virðist nú ætla að enda aðeins austar.

Babel hefur aðeins verið einu sinni í byrjunarliði Liverpool í ensku úrvalsdeildinni á þessu tímabili en er með 1 mark í 9 leikjum. Hann lék alls 91 leik í ensku úrvalsdeildinni með Liverpool og var með 12 mörk og 5 stoðsendingar í þeim. Hann kom inn á sem varamaður í 60 af þessum leikjum.

Milljarðamæringurinn Dietmar Hopp er eigandi Hoffenheim og hann sagði í viðtali við þýska blaðið Bild að liðið þyrfti nauðsynlega að kaupa nýjan sóknarmann vegna hegðunar Demba Ba og meiðsla Chinedu Obasi.