Leicester og Man City þurfa að mætast aftur

Leicester og Manchester City þurfa að mætast aftur til að skera úr um hvort liðið fer áfram í FA-bikarnum. Liðin gerðu 2-2 jafntefli á heimavelli Leicester í dag.

Lið Leicester situr í tólfta sæti ensku B-deildarinnar og barðist fyrir jafnteflinu í dag, liðið átti ekki skilið að tapa leiknum.

Þess má geta að stjóri Leicester, Svíinn Sven-Göran Eriksson, var þjálfari Roberto Mancini, stjóra Man City, í átta ár hjá Sampdoria og Lazio á Ítalíu.

Strax á fyrstu mínútu leiksins komst Leicester yfir þegar Sol Bamba, sem gekk nýverið í raðir félagsins, skoraði. James Milner jafnaði fyrir City eftir laglegan samleik við Carlos Tevez.

Á lokamínútu fyrri hálfleiks sýndi Carlos Tevez snilli sína þegar hann setti boltann snyrtilega í netið og City komið með forystuna. En það var Andy King sem skoraði verðskuldað jöfnunarmark fyrir Leicester á 64. mínútu eftir sjaldséð mistök markvarðarins Joe Hart.

Bæði lið hefðu getað tryggt sér sigurinn eftir það. City bjargaði á línu og markvörður Leicester bjargaði meistaralega. Úrslitin jafntefli 2-2.