Heiðar og félagar komnir með fimm stiga forskot á toppnum

Heiðar Helguson og félagar í Queens Park Rangers eru komnir með fimm stiga forskot á toppi ensku b-deildarinnar eftir 2-1 heimasigur á Aroni Einari Gunnarsson og félögum í Coventry.

Heiðar og Aron Einar léku báðir allan leikinn með sínum liðum en eftir leikinn er QPR í fyrsta sæti deildarinnar með 52 stig eða fimm stigum meira en Cardiff City. Coventry er í 13. sæti, sjö stigum frá því að komast inn í úrslitakeppnina um síðasta lausa sætið í ensku úrvalsdeildinni.

Wayne Routledge skoraði sigurmark QPR á 79. mínútu leiksins en áður hafði Adel Taarabt jafnað metin fyrir QPR í lok fyrri hálfleiks með sínu þrettánda marki á tímabilinu. Marlon King hafði komið Coventry yfir í leiknum á 25. mínútu leiksins.

Heiðar Helguson fékk kjörið tækifæri til að skora á þrettándu mínútu en skallaði boltann í jörðina og yfir markið.