Klappstýra í liði Bonds á móti Íslandi

10. ágúst 2011 10:30

Íslenskir hvalveiðimenn eiga fræga óvini á borð við Pierce Brosnan og Hayden Panettiere.

„Ég fel Obama forseta það verkefni að grípa til harðra aðgerða gegn Íslandi vegna villimannslegra hvalveiða þjóðarinnar," segir leikkonan Hayden Panettiere í yfirlýsingu.

Panettiere er þar með komin í lið með leikaranum Pierce Brosnan á móti hvalveiðum Íslendinga, en eins og Fréttablaðið greindi frá á laugardag hefur hann birt bréf þar sem hann gagnrýnir stefnu Íslendinga í hvalveiðum harðlega. Hann er þekktastur fyrir hlutverk sitt sem James Bond, en hún öðlaðist frægð sem klappstýran Claire Bennet í sjónvarpsþáttunum Heroes.

Panettiere er talsmaður náttúruverndarsamtakanna Whaleman og hefur meðal annars barist gegn hvalveiðum. Eins og Brosnan hvetur hún Barack Obama, forseta Bandaríkjanna, til að beita Íslendinga viðskiptaþvingunum þangað til hvalveiðum verði hætt. „Við hvetjum Obama til að beita svipuðum þvingunum gegn Noregi og Japan," segir hún.

Íslenskir hvalveiðimenn hafa litlar áhyggjur af þessum frægu óvinum. Gunnar Bergmann, framkvæmdastjóri Hvalveiðimanna ehf. sagði í samtali við Fréttablaðið á laugardag að skoðun Brosnans á málinu skipti engu máli. „Ég held að þetta sé fjórða eða fimmta árið í röð sem þessi leikari reynir eitthvað að kvabba um hvalveiðar, sem hann hefur mjög takmarkað vit á," sagði hann. „Hann fer mjög frjálslega með staðreyndir. Hann heldur því til dæmis fram að við veiðum dýr sem eru í útrýmingarhættu. Það tekur enginn vísindamaður í heiminum undir það að hrefnan sé í útrýmingarhættu." - afb

Tengdar fréttir

Deilt um hvalveiðar Íslendinga: "James Bond skýtur þarna yfir markið"

Jón Bjarnason, sjávarútvegs- og landbúnaðarráðherra, ætlar ekki að bregðast við opinberri fordæmingu leikarans Pierce Brosnan á hvalveiðum Íslendinga. Brosnan, sem er hvað best þekktur fyrir hlutverk sitt sem njósnarinn James Bond, er harðorður í garð Íslendinga í opnu bréfi þar sem hann hvetur Barack Obama, forseta Bandaríkjanna, til aðgerða "Það er kominn tími til að senda Íslandi skilaboð sem ekki er hægt að hunsa: Viðskiptaþvinganir," skrifar Brosnan í bréfinu sem birtist í bandarískum fjölmiðlum á dögunum. Bjarni Harðarson, upplýsingafulltrúi sjávarútvegs- og landbúnaðarráðuneytisins, segir Brosnan ekki fara með rétt mál að öllu leyti í bréfinu þar sem hann sakar Íslendinga um ómannúðlegar slátranir á hvölum og vill að þeir gjaldi fyrir það í eitt skipti fyrir öll. "Þarna skýtir James Bond yfir markið sem er nú heldur ólíkt honum," segir Bjarni í samtali við fréttastofu. Hann bendir raunar á að nokkuð sé síðan Brosnan hætti að leika njósnara hennar hátignar og kannski sé það ástæða þess að honum er farið að förlast. Stutt er síðan Barack Obama ítrekaði stuðning Bandaríkjastjórnar við hvalveiðibann og hafnar hann alfarið veiðum í vísindaskyni. Í yfirlýsingu sem Hvíta húsið sendi frá sér nýverið segir að Bandaríkjastjórn hafi verulegur áhyggjur vegna aðgerða íslenskra og norskra fyrirtækja til að endurræsa alþjóðlega verslun með hvalaafurðir. Bréf Brosnan má lesa hér í heild sinni á Huffington Post.

9. ágúst 2011 15:47