Wolfsburg á eftir Jovanovic

Þýska úrvalsdeildarfélagið Wolfsburg hefur lagt fram tilboð í serbneska framherjann Milan Jovanovic, leikmann Liverpool.

Þetta kemur fram á vef Sky Sports í dag en Jovanovic kom til Liverpool í sumar og hefur ekki tekist að festa sig í sessi hjá liðinu. Hann hefur aðeins verið í byrjunarliðinu í fimm skipti á tímabilinu til þessa.

Steve McClaren er stjóri Wolfsburg og mun hafa áhuga á að fá sóknarmann til liðsins til að fylla í skarð Edin Dzeko sem félagið seldi til Manchester City.

Sjálfur hefur Jovanovic sagt að hann vonist til að fá tækifæri hjá Kenny Dalglish sem tók nýverið við sem knattspyrnustjóri Liverpool.

„Ég er viss um að það séu allir ánægðir með að fá nýjan knattspyrnustjóra, bæði þeir sem hafa verið að spila mikið og lítið. Ég hef trú á því að seinni hluti tímabilsins verði betri hjá okkur," sagði Jovanovic við enska fjölmiðla.

„Ég er tilbúinn til þess að leggja áfram mikið á mig og það er í raun það eina sem ég get gert. Stundum fær maður tækifæri þegar maður á síst von á því. Maður verður því ávallt að vera tilbúinn."