Þúsundir mótmæla í Aþenu

Þúsundir mótmælenda hafa nú safnast saman fyrir framan þinghúsið í Grikklandi en í dag munu þingmenn greiða atkvæði um aðgerðir í efnahagsmálum. Samkvæmt breska ríkisútvarpinu bíður lögreglan grá fyrir járnum en í gær brutustu út mikil átök. Í dag er annar dagur verkfalls á almennum vinnumarkaði í Grikklandi.

Tvö stærstu verkalýðsfélög landsins boðuðu til verkfallsins því í dag munu þingmenn greiða atkvæði um lög sem hækka skatta og lækka laun á opinberum vinnumarkaði til að tryggja björgunarpakka og lán frá Evrópusambandinu og Alþjóðagjaldeyrissjóðnum en gríska ríkið er nú í mikilli skuld og efnhagur þjóðarinnar er í mikilli lægð.

Tveggja daga verkfallið hófst í gær en það hefur áhrif á nánast alla starfsemi efnahagskerfisins. Flugumferðarstjórar sneru hins vegar aftur til starfa í dag til að tryggja utan- og innanlandsflug sem lá niðri í gær.

Hinn almenni vinnumarkaður er hins vegar lamaður í dag. Verslunarmenn, skipverjar, leigubílstjórar, læknar, lögfræðingar, kennarar, verkamenn og fleiri lögðu niður störf til að mótmæla frumvarpi gríska þingsins sem greidd verða atkvæði um í dag.