Koparþjófar stálu þriggja tonna kirkjuklukku

Bíræfnir koparþjófar hafa stolið tæplega þriggja tonna þungri sögulegri kirkjuklukku sem stóð fyrir utan St Mary´s dómkirkjuna í San Francisco. Klukku þessari var stöðugt hringt þegar jarðskjálftinn mikli reið yfir borgina árið 1906 og lagði hana í rúst.

Ljóst er að þjófarnir hafa notað stóran krana og vörubíl til að flytja klukkuna af stallinum sem hún stóð á. Hinsvegar virðist enginn hafa orðið var við þjófanna.

Talið er að hægt sé að selja koparinn í klukkunni fyrir um 75.000 dollara eða hátt í níu milljónir króna enda er heimsmarkaðsverð á kopar hátt þessa stundina.