Ben Arfa gæti spilað aftur fyrr en áætlað var

Endurhæfing Hatem Ben Arfa gengur greinilega vel en umboðsmaður hans segir að svo gæti farið að kappinn verði kominn aftur á fullt mun fyrr en áætlað var.

Ben Arfa tvífótbrotnaði í leik með Newcastle gegn Manchester City í október síðastliðnum eftir tæklingu Nigel de Jong.

Lengi hefur verið talið að Ben Arfa myndi ekki spila aftur með Newcastle á tímabilinu en umboðsmaður hans, Simon Stainrod, segir kappann í góðu formi og að hann gæti spilað aftur innan fárra vikna.

„Ég sá hann í síðustu viku og Hatem er á miklu flugi," sagði Stainrod við enska fjölmiðla. „Hann hefur verið að æfa í góða veðrinu í Dúbæ að undanförnu en er nú aftur kominn til Frakklands þar sem hann er að leggja mikið á sig."

Ben Arfa kom sem lánsmaður frá Marseille í haust og náði aðeins að spila fjóra leiki með Newcastle áður en hann meiddist. Hann þótt hins vegar standa sig svo vel að félagið gekk frá kaupum á honum þegar að félagaskiptaglugginn opnaði í janúar.