Gerrard: Carroll þarf að fá betri þjónustu

Leikur Liverpool fór upp á allt annað plan í kvöld er Steven Gerrard kom af bekknum rúmum hálftíma fyrir leikslok. Með Gerrard í stuði vann Liverpool 3-1 sigur.

"Við höfum ekki verið að uppskera eins og við höfum sáð upp á síðkastið. Það var því virkilega ánægjulegt að fá stigin þrjú sem og mörkin þrjú í kvöld," sagði Gerrard eftir leikinn en hvað með Andy Carroll sem virðist fyrirmunað að skora.

"Andy gerði allt sem hann gat til þess að skora en það er ekki honum einum að kenna að hann skori ekki. Við verðum að veita honum betri þjónustu svo hann geti skorað."

Gerrard hefur verið mikið meiddur á árinu og hann sagði afar ánægjulegt að hafa náð að skora.

"Þetta er búið að vera hræðilegt ár vegna meiðslanna og nú lít ég fram á veginn."